ރިދަން އެކަޑަމީ ޗެމްޕިއަންޝިޕް މުބާރާތް މިއަދު ފަށައިފި

• 19 ސެޕްޓެމްބަރ 2025

ތޮއްޑޫ ރިދަން އެކަޑަމީއިން މުޅި ރާއްޖެއަށް ހުޅުވާލައިގެން ބާއްވާ ރިދަން އެކަޑަމީ ޗެމްޕިއަންޝިޕް މުބާރާތް 30 ޓީމަކާއި އެކު މިއަދު ހަވީރު ވަނީ ފަށައިފިއެވެ.

މި މުބާރާތް ކުރިއަށް ގެންދިއުމަށް ހަމަޖެހިފައިވަނީ، ސެޕްޓެމްބަރ މަހުގެ 19 – 26 އާއި ދެމެދުއެވެ. މުބާރާތް ބޭއްވިގެންދަނީ، އއ.ތޮއްޑޫ 1ނަންބަރ ފުޓްބޯޅަ ދަނޑުގައެވެ.

މި މުބާރާތް ބޭއްވިގެންދަނީ 4 އުމުރުފުރާޔަކަށް ބެހިގެންނެވެ. ޖުމްލަ 12 އެކަޑަމީއަކުން ބައިވެރިވެފައި ވާއިރު މި މުބާރާތުގައި ޖުމްލަ 36 ޓީމެއް ވާދަކުރެއެވެ. އެއީ 10 އަހަރުން ދަށުގެ 6 ޓީމާއި، 12 އަހަރުން ދަށުގެ 7 ޓީމާއި، 14 އަހަރުން ދަށުގެ 12 ޓީމާއި، 17 އަހަރުން ދަށުގެ 11 ޓީމެވެ. މިއީ ރިދަން އެކަޑަމީން ރާއްޖެއަށް ހުޅުވާލައިގެން މި މުބާރާތް ބާއްވާ 2ވަނަ އަހަރެވެ.

މިދިޔަ އަހަރާ ހިލާފަށް މިއަހަރުގެ މުބާރާތުގައި ވަނީ ފުޓްބޯޅައިގެ އިތުރުން އެހެން ކުޅިވަރުތަކުގައި ބައިވެރިވުމަށްވެސް ފުރުޞަތު ހުޅުވާލާފައެވެ. އޭގެތެރޭގައި ހޭންޑްބޯޅަ އަދި ބެޑްމިންޓަން ހިމެނެއެވެ. ހޭންޑްބޯލަ މުބާރާތް ހަމައެކަނި 16 އަހަރުން ދަށުގެ އުމުރުފުރާއަށް ހުޅުވާލާފައިވާއިރު ބެޑްމިންޓަން މުބާރާތް ހުޅުވާލާފައިވަނީ އޯޕަންކޮށް ހުރިހާ އުމުރުފުރާއަކަށްވެސް ބައިވެރިވެވޭގޮތަށެވެ.

މިއަހަރުގެ މުބާރާތުގައި ބައިވެރިވެފައިވާ އެކަޑަމީތަކަކީ ކ.ގާފަރު ފިއުޗާ އެކަޑަމީ، ކ.މާފުށި ނިއު ސްޓާރސް ސްޕޯޓްސް ކްލަބް، އއ.ތޮއްޑޫ ރިދަން ސްޕޯޓްސް އެކަޑަމީ، ރަސްދޫ ފުޓްބޯޅަ އެކަޑަމީ، ފ.ދަރަނބޫދޫ ޙައިރް ސްޕޯޓްސް އެކަޑަމީ، ކ.ކާށިދޫ އެމްޖީ ސްޕޯޓްސް އެކަޑަމީ، ހުޅުމާލެ އެޑްވެންޗާރސް ފުޓްބޯޅަ އެކަޑަމީ، އޮޑި ސްޕޯޓްސް ކްލަބް އެކަޑަމީ، މޯލްޑިވްސް ސޮކަރ މޭޓްސް އެކަޑަމީ، މާޒިޔާ ސްޕޯޓްސް އެކަޑަމީ، ސަޑޭ ސްޕޯރޓސް އެކަޑަމީ އަދި ފްރެންޑްސް ފުޓްބޯލް އެކަޑަމީއެވެ. މިއަހަރުގެ މުބާރާތުގެ 17 އަހަރުން ދަށުގެ ޗެމްޕިއަން ޓީމަށް 10 ހާސް ރުފިޔާ ފައިސާގެ އިނާމެއް ދިނުމަށް ވަނީ ހަމަޖެހިފައެވެ. އަދި މީގެ އިތުރުންވެސް އެކި އުމުރުފުރާތަކުގެ ޗެމްޕިއަން ޓީމުތަކަށް އިނާމު ދިނުމަށް ހަމަޖެހިފައިވެއެވެ.

މުބާރާތުގެ ފުރަތަމަ މެޗް ގައި ވާދަކޮށްފައިވަނީ 14 އަހަރުން ދަށުގެ އޮޑި ސްޕޯރޓްސް ކްލަބް އެކަޑަމީ އާއި މޯލްޑިވްސް ސޮކަރ މޭޓްސް އެކަޑަމީ ޓީމެވެ. މެޗް ނިމިގެން ދިޔައީ 1-1 އެއްވަރު ވެގެންނެވެ.