މާލޭ ގެއެއްގައި އަލިފާނުގެ ހާދިސާއެއް ހިނގައިފި.

• 09 ސެޕްޓެމްބަރ 2025

އިއްޔެ ހެނދުނުގެ ވަގުތެއްގައި މާލޭ ގެއެއްގައި އަލިފާނުގެ ހާދިސާއެއް ހިނގިކަމަށް މައުލޫމާތު ލިބިފައިވެއެވެ.

އަލިފާނުގެ ހާދިސާ ހިނގާފައިވަނީ ހ.ވެލްބޯން ގޭ ދެވަނަ ފަންގިފިލާގެ އެޕާރޓްމެންޓް އެއްގެ ބަދިގޭގައެވެ. މި ހާދިސާ ހިނގައިގެން އެމްއެންޑީއެފްއަށް އަންގާފައިވަނީ އިއްޔެގެ 11:00 ކަންހާއިރު ކަމަށް އެމްއެންޑީއެފުން މައުލޫމާތު ދިނެވެ.

މިހާދިސާ ހިނގައިފައިވަނީ ބަދިގޭ ހުޑެއްގައި ރޯވެގެންކަމަށް މައުލޫމާތު ލިބެއެވެ. އަދި އަލިފާން ރޯވެގެން އެންގިތާ ކުޑައިރުކޮޅެއްތެރޭ އެމްއެންޑީއެފް ފަޔާ އެންޑް ރެސްކިއު ޓީމް އިން ވަނީ އަލިފާންގަނޑު ނިއްވާލާފައެވެ. 11:17 ކަންހާއިރު އަލިފާން ގަނޑު ނިއްވާލެވުނު ކަމަށް އެމްއެންޑީއެފުން ބުނެފައިވެއެވެ.

ކުޑަވަގުތުކޮޅަކުން ނަމަވެސް ބަދިގޭގެ ހާލަތު ވަރަށް ގޯސްވެފައިވާކަން ފޮޓޯ އިން ފެނިގެން ދެއެވެ. ބަދިގޭގެ ބައެއް ކަރަންޓް ސާމަނާއި ކަބަޑްތައް ވަރަށްބޮޑަށް ހަލާކްވެފައިވާ ތަން ފެނެއެވެ.

މިހާދިސާގައި އެއްވެސް މީހަކަށް ގެއްލުން ނުވާކަމަށް އެމްއެންޑީއެފުން މައުލޫމާތު ދިނެވެ.