އއ އަތޮޅުގެ ބީ.އެމް.އެލް ޗެމްޕިއަންޝިޕް 2025/26 މުބާރާތް އއ.ތޮއްޑޫ އިން ކާމިޔާބުކޮށްފި
- 22 ނޮވެމްބަރ 2025
ވަރަނޫސް
އއ.އުކުޅަސް ފުޓްބޯޅަ ޓީމުގެ މައްޗަށް ކުރި ހޯދާ ބީ.އެމް.އެލް އެޓޯލް ޗެމްޕިއަންޝިޕް އއ.އަތޮޅުގެ ޗެމްޕިއަންކަން ތޮއްޑޫ ސްޕޯޓްސް ކްލަބް ހޯދައިފި.
މިއަދު ހަވީރު ކުޅުނު ފައިނަލް މެޗް ތޮއްޑޫ ސްޕޯޓްސް ކްލަބް ކާމިޔާބުކުރީ އުކުޅަހު ފުޓްބޯޅަ ޓީމުގެ މައްޗަށް 3-1 ލަނޑުން ކުރި ހޯދައިގެންނެވެ. މެޗްގެ ވަރަށް ކުރީކޮޅު ތޮއްޑޫ ޓީމުގެ އަހުމަދު ޝަމީމް ލަނޑެއް ކާމިޔާކޮށްދީ އެ ޓީމަށް ކުރި ހޯދާދީފައިވަނިކޮށް އޭގެ 2 މިނެޓް ފަހުން އުކުޅަހު ޓީމަށް މެޗްގެ ނަތީޖާ ހަމަހަމަކޮށްދިނީ ސިރުޙާނުއެވެ. ވާދަވެރި ކުޅުމެއް ދެޓީމުގެ ފަރާތުންވެސް ފެނިގެންދިޔަ މި މެޗްގައި އެކުޅަހު ޓީމުގެ 2 ކުޅުންތެރިޔަކަށް ވަނީ ރަތްކާޑު ދައްކާ ދަނޑުން ފޮނުވާލާފައެވެ. އުކުޅަހު ޓީމުގެ ކީޕަރު އޭރިޔާތެރެއިން ކުރި ފައުލަކާ ގުޅިގެން ދެވަނަ ރީނދޫ ކާޑާއެކު ރަތްކާޑު ދައްކާ ދަނޑުން ފޮނުވާލިއިރު ބަދަލު ކީޕަރެއްގެ ގޮތުގައި ކުޅެން ނުކުތް ކުޅުންތެރިޔާ މެޗުތެރެއިން ރެފްރީއާ ދިމާއަށް ބުނި އެއްޗަކާ ގުޅިގެން ވަނީ ރަތްކާޑު ދައްކާ ދަނޑުން ފޮނުވާލާފައެވެ. މެޗްގެ ފަހު 10 މިނެޓް އުކުޅަހު ޓީމުން މެޗް ފުރިހަމަ ކުރަން ޖެހުނީ 9 ކުޅުންތެރިންނާއެކުއެވެ. މި މެޗްގައި ތޮއްޑޫ ފުޓްބޯޅަ ޓީމަށް ދެވަނަ ފަހަރަށް ލީޑް ނަގައިދިނީ އިބްރާހިމް އުޝާމަތުއެވެ. އަދި މެޗް ނިމެން ދަނިކޮށް މި ލީޑް އިތުރަށް ފުޅާކޮށްދިނީ ލިބުނު ޕެނަލްޓީއަކުން މުޙްތާރު ނަސީރު (ޓޫކިލޯ) އެވެ.
ފައިނަލް މެޗްގެ މޮޅު ކުޅުންތެރިޔަކަށް ހޮވިފައިވަނީ ތޮއްޑޫ ޓީމަށް ފުރަތަމަ ލީޑް ހޯދައިދިން އަހުމަދު ޝަމީމްއެވެ. އެންމެ ގިނަ ލަނޑު ޖެހި ކުޅުންތެރިޔަކަށް ހޮވިފައިވަނީ އުކުޅަހު ޓީމަށް މެޗްގެ ނަތީޖާ ހަމަހަމަކޮށްދިން ލަނޑު ކާމިޔާބުކުރި ޝިރުހާނުއެވެ. މުޅި މުބާރާތުގެ އެންމެ މޮޅު ކުޅުންތެރިޔަކަށް ހޮވިފައިވަނީ ތޮއްޑޫ ޓީމަށް ދެވަނަ ލަނޑު ކާމިޔާބުކޮށްދިން އިބްރާހިމް އުޝާމަތުއެވެ. މި މުބާރާތުގެ ފައިނަލަށް ދަތުރުކުރި ދެ ޓީމަށްވެސް ވަނީ ޒޯން މުބާރާތުގައި ވާދަކުރުމުގެ ފުރުޞަތު ލިބިފައެވެ.
މި މުބާރާތަކީ އެފް.އޭ.އެމް އިން އިންތިޒާމްކޮށްގެން ފުޓްބޯޅައިގެ އިހު އޮތް ފޯރި ގެނައުމަށް ކުރިއަށްގެންދާ ޕްރޮގްރާމްގެ ދަށުން ބާއްވާ މުބާރާތެއްކަމަށް އެފް.އޭ.އެމް އިން ވަނީ ބުނެފައެވެ.
