ނަފްސާނީ ދުޅަހެޔޮކަމުގެ ދުވަސް ފާހަގަކުރުމުގެ ގޮތުން މުހިންމު ސެޝަންތަކެއް އއ.ތޮއްޑޫގައި ބާއްވާފައިފި

• 28 އޮކްޓޯބަރ 2025

ނަފްސާނީ ދުޅަހެޔޮކަމުގެ ދުވަސް ފާހަގަކުރުމުގެ ގޮތުން އއ.ތޮއްޑޫ ކައުންސިލް، ތޮއްޑޫ ސިއްޙީ މަރްކަޒް އަދި ތޮއްޑޫ ސްކޫލުގުޅިގެން މުހިންމު ސެޝަންތަކެއް ބާއްވާފައިވެއެވެ.

އޮކްޓޯބާރ 24 އަދި 25 ހުގައި ތޮއްޑޫ ސްކޫލް ދަރިވަރުންނާއި، ބެލެނިވެރިން އަދި ސްކޫލް މުވައްޒަފުންނަށް ހާއްސަކޮށްގެން 3 ސެޝަނެއް ނަފްސާނީ ދުޅަހެޔޮކަމާއި ބެހޭގޮތުން ބާއްވާފައިވެއެވެ.

ތޮއްޑޫ ސްކޫލް ދަރިވަރުންނަށް ޙާއްސަކޮށް ބޭއްވުނު ސެޝަންގައި ހާއްސަކޮށް އަލިއަޅުވާލާފައިވަނީ، ދަރިވަރުންގެ އިހުސާސްތައް ކޮންޓްރޯލް ކުރުމާއި، ރަނގަޅު ކުއްޖަކަށް ވުމަށް ބޭނުންވާ ހުނަރުތައް ދަސްކޮށްދިނުމާއި، އެކުވެރިންނާއި ޖެހޭ ތަފާތު މައްސަލަތައް އަމިއްލައަށް ހައްލުކުރަން ދަސްކޮށްދިނުމާއި އަދި ދަރިވަރުންނަށް ދިމާވާ ކަންބޮޑުވުންތަކުގައި އެކަމާ ކުރިމަތިލާނެ ގޮތްތައް ދަސްކޮށްދިނުމެވެ.

ތޮއްޑޫ ސްކޫލް ބެލެނިވެރިންނަށް ހާއްސަކޮށް ބޭއްވުނު ސެޝަންގައި އަލިއަޅުވާލާފައިވަނީ، ކުދިން ރަނގަޅުގޮތުގައި ތަރުބިއްޔަތު ކުރުމަށް ކުރެވިދާނެ ކަންތައްތައް ބުނެދިނުމާއި، ދަރިވަރުންގެ އިހުސާސްތައް ދެނެގަނެ، އެކުދިންނާއި މުއާމަލާތްކުރާނެ ގޮތް ބުނެދިނުމާއި، ބެލެނިވެރިންނަށް ދިމާވާ ކަންބޮޑުވުންތަކުގައި އެކަމާއި ކުރިމަތިލާނެ ގޮތްތައް ބުނެދިނުމެވެ.

ތޮއްޑޫ ސްކޫލް މުވައްޒަފުންނަށް ހާއްސަކޮށް ބޭއްވުނު ސެޝަންގައި އަލިއަޅުވާލާފައިވަނީ، މުދައްރިސުންނަށް ދިމާވާ ކަންބޮޑުވުންތަކާއި ކުރިމަތިލާނެ ގޮތްތައް ބުނެދިނުމާއި، ތަފާތު މިޒާޖުގެ ކުދިންނާއި ކުރިމަތިލާއިރު ކަންތައް ކުރެވިދާނެ ގޮތްތައް ބުނެދިނުމެވެ.

މި ތިން ސެޝަންވެސް ބޭއްވިގެން ދިޔައީ މިދިޔަ ހުކުރު އަދި ހޮނިހިރު ދުވަހު ހިރިލަންދޫ ސްކޫލް ކައުންސެލާރ ސުލްޠާނާ އާދަމް އާއި އެކުގައި ކަމަށް ތޮއްޑޫ ސިއްޙީ މަރްކަޒުން މައުލޫމާތު ދިނެވެ.

އަދި މި ސެޝަންތައް ބޭއްވުމުގެ އެންމެ ބޮޑު މަޤަސަދަކީ ހުރިހާ އުމުރުފުރައެއްގެ މީހުން ނަފްސާނީ ސުޅަހެޔޮކަމަށް ބޮޑަށް ހޭލުންތެރިކުރުވުންކަމަށް ސުލްޠާނާ އާދަމް މައުލޫމާތު ދީފައިވެއެވެ.